චතුරාය්‍ය සත්‍යය

Feb 07, 2015 Comments Off on චතුරාය්‍ය සත්‍යය by

ලෝකයේ වාසය කරන මනුෂ්‍ය තිරස්චීනාදී සත්වයන් පිළිබඳ හා අන්‍ය ලෝක වස්තුන් පිළිබඳව ද සාමාන්‍ය ජනයාට ඇත්තේ වැරදි වැටහීමකි. ඔව්හු ද්‍රව්‍ය නොවූ ක්‍රියා රාශියක් ද්‍රව්‍යන් ලෙසද, කුඩා ද්‍රව්‍ය සමූහයන් මහත් වස්තුන් ලෙස ද, සත්ව පුද්ගල භාවයක් නැති ධාතු සමූහයක් සත්වයන් පුද්ගලයන් ලෙස ද, අනිත්‍ය දෙය නිත්‍ය දෙයක් සැටියට ද, අශුභ දෙය සුන්දර දෙයක් හැටියට ද, දුකම සුවයක් හැටියට ද, දුක් ඉපදීමේ හේතුව සැප ලැබීමේ හේතුවක් හැටියට ද, සත්‍ය වූ සැපය හා එය ලැබීමේ ප්‍රතිපත්තිය මහත් නපුරක් හැටියට ද, වරදවා තේරුම් ගෙන සිටති. තථාගතයන් වහන්සේ වනාහි ඒ සියල්ල තත්වාකාරයෙන් දැන වදාළ සේක. ලෝක තත්වය පිළිබඳ තථාගතයන් වහන්සේ විසින් දක්නා ලද ආකාරය ආර්ය්‍ය සත්‍යය නාමයෙන් හඳුන්වනු ලැබේ.

ලෝක තත්වය පිළිබඳ වැරදි හැඟීම් ඇතිව එයම පරම සත්‍ය හැටියට පිළිගෙන, එයට අනුවම සිතන එයට අනුවම සියලු ක්‍රියා කරන තැනැත්තා හට වැටහෙනුයේ තථාගතයන් වහන්සේගේ සත්‍ය වූ ආර්ය්‍ය සත්‍යය අසත්‍යයක් හැටියටය. ඒ නිසා ඔව්නට මේ ධර්මය දැන ගැනීම ඉතා දුෂ්කරය. බුද්ධ ධර්මයේ පරම සාරයත් චතුරාය්‍ය සත්‍යය ම ය. එබැවින් නියම බෞද්ධයකු වන්නට නම් ආර්ය්‍ය සත්‍යයන් පිළිබඳ තරමක දැනුමක්වත් ඇති කරගත යුතුය. මෙකල වසන බෞද්ධ ගෘහස්තයන්ගෙන් තබා පැවිද්දන්ගෙන්ද වැඩිදෙනෙක් මේ ආර්ය්‍ය සත්‍යය පිළිබඳ ඡායාමාත්‍ර දැනුමක්වත් නැත්තෝය. මේ චතුරාය්‍ය සත්‍යය අනුන්ගේ උපකාරයෙන් තොරව ස්වශක්තියෙන් ම කෙනෙකුට සොයාගත හැකි තේරුම් ගත හැකි ධර්මයක්ද නොවේ. ඒ ධර්මය තරමකින් වත් බෞද්ධ ජනයාට දැන ගැනීමට නම් පහසුවෙන් තේරුම් ගත හැකි සැටියට ලියවුණු පොත් තිබිය යුතුය. මේ වනතුරුත් එබඳු පොත් සුලබ වී නැති බැවින් බෞද්ධ ජනතාවට ආර්ය්‍ය සත්‍යයන් තරමකින් වත් දැන ගැනුමට උපකාර වීමේ අදහසින් අපගේ නැණ පමණින් මහත් පරිශ්‍රමයෙන් මේ පොත සම්පාදනය කරන ලදී.

අටුවා පොත් අතරින් ද චතුරාය්‍ය සත්‍යය පිළිබඳ දීර්ඝ විස්තරයක් දක්වා ඇත්තේ ‘සම්මෝභවිනෝදනී’ නම් වූ විභංගප්‍රකණාර්ථ කතාවේ හා ‘විසුද්ධි මාර්ගයේ’ ය. පාළි භාෂාව නොදත් සාමාන්‍ය ජනයාට ඒවායින් ප්‍රයෝජනයක් නො ලැබිය හැකිය. පාළි භාෂාව දත් පමණින්ද ඒවා කියවා චතුරාය්‍ය සත්‍යය තේරුම් ගැනීම පහසු වැඩක් නොවේ. ඒ ඒ පොත්වල චතුරාය්‍ය සත්‍යය විස්තර කර තිබෙන්නේ ධම්මසංගනී ප්‍රකරණයෙහි එන පරමාර්ථ ධර්ම විභාගයන් මැනවින් උගත් අයට දැන ගැනීමට සුදුසු හැටියටය. පූර්වභාගයෙහි ඇති කරගන්නා ලද පරමාර්ථ ධර්ම පිළිබඳ දැනුමක් නැතිව පාළි භාෂාව දත් පමණින්ම ඒවායේ යථාර්තය දත හැකිවේය යන අදහසින් ඒ පොත කියවන්නවුන්ට ඇති වනුයේ නො දැනම ‘දැනගතිමි’ යන රැවටීමක් පමණකි. ඒ රැවටිමනම්, කොහෙත්ම නොදැන සිටීමටත් වඩා නපුරකි. පාළි භාෂාව පමණක් උගෙන දහම් පොත් කියවා එසේ රැවටී සිටින අය මෙකල බොහෝය.

අප අදහස වුයේ පාළි භාෂාව හා පරමාර්ථ ධර්ම විභාගයෙන් ද කලින් දැන නො සිටින අයටත් මේ ධර්මය පිළිබඳ තරමකටවත් ශුද්ධ දැනුමක් ඇතිකර ගත හැකි වන සැටියට පොතක් සම්පාදනය කිරීමය. එබැවින් අප විසින් සම්මෝභවිනෝදනී ආදියෙහි චතුරාය්‍ය සත්‍යය වර්ණනා කර තිබෙන මග නො ගෙන මේ පොත ලිවීමට අන් මගක් ගන්නා ලදී. කෙසේ ලියු කල්හි කියවන්නාට පහසුවෙන් කාරණය අවබෝධ වේ යයි කරුණක් පාසාම කල්පනා කොට ඒ ඒ අවස්ථාවන්හි අපට කල්පනා වූ පරිද්දෙන් කරුණු පහදමින් මේ පොත සම්පාදනය කෙළෙමු.

නවකතා පොතක් කියවන්නකුට වෙහෙසක් නැතිව අර්ථයත් කතා රසයත් ලැබෙන සේ ලෙහෙසියෙන් අර්ථය හා ධර්ම රසය ලැබෙන හැටියට ගැඹුරු ධර්මයන් පිළිබඳ පොත් සම්පාදනය නොකළ හැකිය. එබැවින් කථිකයන්ගේ හෝ ලේඛකයන්ගේ හෝ සමත්කමේ අනුහසින්ම ගැඹුරු ධර්මයන් ලෙහෙසියෙන් තේරුම් ගන්නනට බලාපොරොත්තු නොවී, ධර්මය අවබෝධ කර ගැනීමට පොත් කියවන්නා විසින් ද උත්සාහ කල යුතුය. චතුරාය්‍ය සත්‍යය දනු කැමතියන් විසින් මෙම පොත නවකතා පොතක් මෙන් වරක් දෙවරක් කියවා හැර නො දමා වාර බොහෝ ගණනක් නැවත නැවතත් කියවිය යුතුය. පොතේ කියවෙන කරුණු සිත්හි තබාගෙන ඒවා ගැන නැවත නැවතත් කල්පනා කල යුතුය. එසේ කළ හොත් සියල්ල දත් කවරකුට වූව ද මේ පොතේ උපකාරයෙන් චතුරාය්‍ය සත්‍යය පිළිබඳ මනා දැනුමක් ඇති කරගත හැකිවනු ඇත. මෙම පොත ආදරයෙන් කියවා තථාගතයන් වහන්සේගේ සත්‍ය වූ චතුරාය්‍ය සත්‍යය ධර්මය උගෙන නියම බෞද්ධයන් වී සසර දුකින් මිදී නිවන් සුවය ලැබීමට සියල්ලෝම උත්සහා කරත්වා.

මෙයට – ශාසනස්ථිකාමී,
රේරුකානේ චන්දවිමල ස්ථවිර

රේරුකානේ චන්දවිමල හිමි

About the author

The author didnt add any Information to his profile yet